Veiðigjald eftir landshlutum

Veiðigjald sundurliðað niður á tegundahópa eftir landshlutum

Samanlögð upphæð árin 2019 til og með 2023, í milljónum króna

Á þessari mynd má sjá samanlagt veiðigjald sem greitt var í hverjum landshluta á árunum 2019 til 2023. Vestmannaeyjar eru tilgreindar sérstaklega og teljast því ekki til Suðurlands hér, en annars er flokkunin niður á landshluta með hefðbundnum hætti. Fjárhæð veiðigjaldsins er sundurliðuð eftir tegundahópum. Þar eru þorskur og ýsa sérstaklega tilgreind og undir flokknum aðrar tegundir eru rækja, humar, hvalir og ýmis sjávargróður. Auk þess má sjá hversu mikið tekjur ríkissjóðs lækka á ári hverju vegna afsláttarins sem löggjafinn veitir af veiðigjaldinu. Þessi mynd endurspeglar ágætlega hversu ólíkir landshlutarnir eru þegar kemur að fiskveiðum á einstaka tegundum. Stærsti hluti uppsjávarveiða er stundaður af fyrirtækjum sem staðsett eru á Austurlandi og í Vestmannaeyjum, en þaðan kemur stærsti hluti tekna ríkissjóðs af veiðigjaldi af uppsjávartegundum. Veiðigjald af þorskveiðum vegur svo á bilinu 60% til 65% af heildarupphæð veiðigjalds á Suðurnesjum, Vesturlandi, Vestfjörðum og Norðurlandi vestra og eystra. Mestu greiðslurnar af þorskveiðum koma frá Suðurnesjum og Norðurlandi eystra. Sjá má að afslátturinn hefur mest áhrif til lækkunar á veiðigjaldi á Vesturlandi og Vestfjörðum, enda er þar mikill fjöldi smærri aðila. Afslátturinn leiddi til þess að heildarupphæð veiðigjaldsins var 12% lægri á Vesturlandi og 11% lægri á Vestfjörðum. Áhrif afsláttarins eru minnst í Vestmannaeyjum, en hann leiddi til rétt rúmlega 3% lækkunar á því sem útgerðir þar greiddu í veiðigjald á tímabilinu.

*Suðurland að Vestmannaeyjum undanskildum

Heimild: Fiskistofa

Vægi landshluta í heildarfjárhæð veiðigjalds

Á þessari mynd má sjá vægi hvers landshluta í heildarupphæð veiðigjalds á ári hverju á tímabilinu frá 2019 til 2023. Vestmannaeyjar eru sérstaklega tilgreindar. Langstærsti hluti veiðigjalds er greiddur af sjávarútvegsfyrirtækjum á landsbyggðinni, eða 81% til 84% á þessu tímabili. Eðlilega sveiflast þetta hlutfall á milli ára eftir landshlutum, en það er háð veiðiheimildum einstaka tegunda sem breytist frá einu ári til annars og samsetningu aflaheimilda á milli landshluta. Eins og sjá má á myndinni á undan, þá eru svæðin jafnframt ólík þegar kemur að veiðum á einstaka tegundum.

*Suðurland að Vestmannaeyjum undanskildum

Heimild: Fiskistofa

Fjöldi greiðenda veiðigjalds eftir landshlutum

Á þessari mynd má sjá fjölda aðila sem greiðir veiðigjald í hverjum landshluta, en Vestmannaeyjar eru sérstaklega tilgreindar. Ánægjulegt er að sjá að í öllum landshlutum eru öflug sjávarútvegsfyrirtæki sem greiða stóran hluta veiðigjalds hvers svæðis. Vestfirðir eru fjölmennasta svæðið hvað varðar fjölda gjaldskyldra aðila, en að jafnaði hafa um 190 aðilar greitt veiðigjald á ári hverju á Vestfjörðum á þessu tímabili. Þar á eftir kemur Norðurland eystra og svo Vesturland. Fæstir aðilar eru í Vestmannaeyjum, eða að jafnaði í kringum 25 talsins á ári hverju. Sé heildarupphæð veiðigjalds hvers landshluta deilt niður á fjölda aðila sem greiðir veiðigjald eru Vestmannaeyjar með yfirburðastöðu. Það kemur heim og saman við það að afslátturinn hefur minnst áhrif til lækkunar á heildarupphæð veiðigjaldsins sem greidd er í Vestmannaeyjum.

*Suðurland að Vestmannaeyjum undanskildum

Heimild: Fiskistofa