Vinnumarkaður

Samfara auknum umsvifum í fiskeldi hér á landi hefur orðið mikil fjölgun á störfum. Á árinu 2018 störfuðu alls um 470 manns í fiskeldi, sem er tæp þreföldun frá árinu 2008. Mikill munur er á vægi fiskeldis eftir því hvort miðað er við landsbyggðina eða höfuðborgarsvæðið. En að jafnaði mátti rekja rúmlega 80% atvinnutekna í fiskeldi til landsbyggðarinnar á þessu 11 ára tímabili. Sjá nánar í umfjöllun um atvinnutekjur.

Heimild: Hagstofa Íslands

Fjölgun starfa hefur verið mun meiri vegna sjókvíaeldis en eldis í ferskvatni á undanförnum árum. Á árinu 2008 störfuðu ríflega þrefalt fleiri við eldi í ferskvatni en í sjókvíaeldi en í dag starfa þar jafnmargir.  Hefur starfsmönnum í sjókvíaeldi fjölgað úr 38 í 234, sem er rúm sexföldun á tímabilinu. Á sama tíma fjölgaði störfum í eldi í ferskvatni úr 128 upp í 234. 

Heimild: Hagstofa Íslands

Heildaratvinnutekjur í fiskeldi námu um 3.360 milljónum króna árið 2018 samanborið við 3.140 milljónir árið á undan. Nemur aukningin rúmlega 7% að raunvirði milli ára sem er í takti við þróun í fjölda starfandi, en þeim fjölgaði um tæp 7%. Hafa atvinnutekjurnar í fiskeldi fjórfaldast á föstu verðlagi frá árinu 2008, sem rímar vel við þann vöxt sem verið hefur í greininni. Sjá má að vægi fiskeldis á landsbyggðinni er margfalt meira en á höfuðborgarsvæðinu, en að jafnaði hefur mátt rekja um 81% atvinnutekna í fiskeldi til tekna á landsbyggðinni á þessu tímabili.

Heimild: Byggðastofnun

Mikill munur er á vægi atvinnutekna í fiskeldi af heildaratvinnutekjum eftir landshlutum. Vestfirðir skera sig verulega frá öðrum landshlutum, en þar eru umsvif fiskeldis hvað mest. Rekja má um þriðjung atvinnutekna af fiskeldi á landinu öllu til fiskeldis á Vestfjörðum, eins og sjá má á næstu mynd. Hafa atvinnutekjur í fiskeldi á svæðinu sautjánfaldast að raunvirði frá árinu 2008 til ársins 2018. Stóðu þær undir 4,2% af atvinnutekjum á Vestfjörðum á árinu 2018 samanborið við einungis 0,3% árið 2008. Umsvif fiskeldis á þennan kvarða eru næstmest á Suðurnesjum og svo á Austurlandi.

Heimild: Byggðastofnun

Umsvif fiskeldis eru langmest á Vestfjörðum og voru atvinnutekjur þar af fiskeldi rúmlega 1.040 milljónir króna á árinu 2018. Þar af mátti rúmlega 87% teknanna rekja til atvinnutekna í fiskeldi á sunnanverðum Vestfjörðum. Á því svæði er fiskeldi þriðja stærsta atvinnugreinin á kvarða atvinnutekna, á eftir atvinnutekjum í sjávarútvegi og opinberri stjórnsýslu. Miðað við Vestfirði alls eru atvinnutekjur af fiskeldi í áttunda sæti af 19 atvinnugreinum, en þar er sjávarútvegur langstærstur. Atvinnutekjur í fiskeldi eru næsthæstar á Suðurnesjum en þar á eftir kemur höfuðborgarsvæðið. Miðað við myndina á undan og þessa hér má sjá jafnframt sjá að verulegur munur er á milli hlutdeild atvinnutekna á einstökum landsvæðum og svo fjárhæð atvinnutekna. Endurspeglar það mismunandi atvinnuhætti á milli svæða.

Heimild: Byggðastofnun