Fjárfesting

Fyrirtæki í sjávarútvegi hafa ráðist í verulegar fjárfestingar á undanförnum árum. Í raun hefur fjárfesting í sjávarútvegi ekki verið meiri en á undanförnum árum frá því að upphafleg lög um stjórn fiskveiða frá árinu 1990 tóku gildi. Fyrirtækin hafa fjárfest í nýjum sparneytnari skipum og vinnslum sem eru útbúnar með hátæknivélum, sem oftar en ekki eru íslenskt hugvit og smíð. Þessar fjárfestingar eru nauðsynlegar og hafa verið ráðandi þáttur í að tryggja samkeppnishæfni greinarinnar í alþjóðlegri samkeppni, stuðlað að aukinni verðmætasköpun og treyst áframhaldandi atvinnu hér á landi. Árangur fyrirtækjanna við að minnka kolefnissporið er þó einn veigamesti ábatinn sem fengist hefur með aukinni fjárfestingu. Á myndinni má sjá fjármunamyndun í sjávarútvegi frá árinu 1990, bæði í veiðum og vinnslu. Fjármunamyndun er nettó fjárfesting, það er fjárfesting að frádregnum seldum eignum. Fjármunamyndun fylgir að jafnaði sjóðstreymi, en í tilfelli skipa og tækja sem eru smíðuð erlendis miðast hún við dagsetningu innflutnings þeirra.

---

Skýring: Tölur Hagstofunnar fyrir 2020 og 2021 eru bráðabirgðatölur.

Heimild: Hagstofa Íslands